Pleno no concello de Vigo. Sonia Daponte/AGN Na sesión plenaria de hoxe debatéronse conxuntamente dúas propostas sobre as caixas de aforros, unha delas defendida polos socialistas, onde se instaba a Xunta a que "non obstaculice" e permita a Caixanova desenvolver o seu proxecto empresarial "autónomo, estábel, solvente e eficiente", así como o mantemento da súa identidade como institución financeira, coa súa sede en Vigo e co seu nome actual. A iniciativa non saíu adiante ao absterse o BNG e votar en contra o PP.

En canto á moción do grupo nacionalista, tras unha emenda presentada polo seu portavoz, Santiago Domínguez Olveira, aprobouse por unanimidade pedir que os centros de decisión das dúas caixas permanezan en Galiza, así como manifestar a necesidade de aprobar unha nova Lei de Caixas de aforro. Esta proposta, igual á aprobada polos tres partidos no Parlamento, recibiu o apoio unánime dos grupos municipais de PSOE, BNG e PP.

“Acoso a Caixanova”

O alcalde de Vigo, Abel Caballero, quen interveu como portavoz do grupo socialista, asegurou que Caixanova ten un proxecto "solvente" e "capaz de seguir aguantando a crise" e, segundo engadiu, sen ter necesidade de acudir ao FROB. Con todo, denunciou que a Xunta "está acosando" o proxecto da caixa viguesa e acusou o presidente autonómico, Alberte Núñez Feixóo, de exercer "enormes presións" a favor dunha fusión con Caixa Galicia.

A xuízo do socialista, esta fusión sería unha "absorción" a Caixanova por parte de Caixa Galicia e, ademais, a entidade resultante estaría nunha situación "débil". Así, o alcalde vigués afirmou que o Executivo galego está "defendendo intereses localistas doutras cidades" ao querer "resolver un problema do norte de Galiza co traballo do sur".

Caballero defendeu a posibilidade de Sistemas Institucionais de Protección (SIP), sempre que Caixanova manteña o "liderado" e a súa sede na cidade olívica. Así, augurou que "non haberá fusión" das caixas galegas xa que, segundo recordou, o Consello de Administración de Caixanova ratificou o pasado xoves no seu rexeitamento a esta vía.

Finalmente, destacou que defender o plan de Caixanova é defender un proxecto "serio" para Vigo e, xa que logo, tamén para Galiza, e criticou que a presidenta do PP local, Corina Porro, opte por "permanecer calada" neste tema.