A fachada do Parlament de Catalunya

Para os socialistas, este xesto subliña "até que punto o presidente da Generalitat falou o domingo pasado no nome de Catalunya". Ese día, o tamén líder do PSC asegurou que unha interpretación restritiva do texto sería "o peor servizo" á Constitución e constatou a gravidade que supón atrasar o fallo.

Os socialistas cataláns reiteraron hoxe nun comunicado que o PP debe retirar o seu recurso contra o Estatut, e criticaron "a intolerábel presión" que supón bloquear a renovación do Tribunal Constitucional.

O editorial saiu publicado hoxe en La Vanguardia, El Periódico de Catalunya, Avui, El Punt, Segre, Diari de Tarragona, La Mañana, , El Nou 9, Diari de Sabadell, Diari de Terrassa, Diari de Girona e Regió 7, estes dous últimos do grupo Prensa Ibérica que tamén edita o Faro de Vigo.

"Espírito de dignidade"

A federación de CiU celebrou a iniciativa do editorial a favor do Estatut e animou o pobo catalán a seguir "o espírito de dignidade" que emana das portadas dos xornais que instan ao Tribunal Constitucional (TC) a respectar o Estatut aprobado en referendo e en defensa da dignidade catalá.

Os converxentes aseguraron nun comunicado que a sentenza do TC sobre o Estatut pode representar "un momento grave" na historia catalá e "profundar nun desencontro non desexado".

CiU recordou que o Estatut non representa unha norma administrativa "fría" froito do cálculo político e as circunstancias, senón un "depósito de esperanza" dun pobo que quere desenvolver o seu futuro en paz e prosperidade.

Ademais, o portavoz de CiU no Congreso dos Deputados, Josep Antoni Duran i Lleida, negou que o editorial sexa unha "presión" ao Constitucional e destacou que, en todo caso, os que si presionaron os maxistrados foron PSOE e PP ao non renovar o pleno deste órgano.

"Síntome emocionado"

O conseller de Medio Ambiente e Vivenda da Generalitat, Francesc Baltasar (de ICV), amosouse "emocionado" co editorial conxunto a prol do Estatut. En declaracións a Catalunya Ràdio, asegurou que tras ler o editorial se sentiu máis apoiado e coa sensación de que, no caso de que o TC dite unha sentenza adversa, "se podería vertebrar unha gran resposta nacional". "Síntome cómodo e súmome" á demanda do texto, engadiu.