Novo obxectivo na loita contra o galego: os Concellos. O director xeral de Administración Local da Xunta, Xosé Norberto Uzal Tresandí, ex-candidato de Falange Española Independiente nas eleccións ao Parlamento Europeo, vén de lles remitir a numerosos Concellos galegos unha circular, referida ás convocatorias de prazas efectuadas por estas institucións, nas que fai constar a directriz (ben coherente coa súa ideoloxía) de reducir aínda máis a incorporación do galego á administración local, chegando a manipular e amputar o que a este respecto determina a última modificación da Lei da Función Pública –xa de por si ben restritiva– operada no mes de xuño polo PP, e atrevéndose a ameazar directamente os Concellos no caso de non se someteren a ese superior designio.

Nada de probas en galego. Prohibidas! E advirte o director xeral coa intención de proceder directamente desde a Xunta á impugnación de calquera proceso selectivo nos Concellos que non declaren exentos da realización de probas en galego a aqueles aspirantes que posúan algún certificando de coñecemento. A propia lei matiza e suaviza esta intención, aínda que este director xeral oculta convenientemente na mesma comunicación de xeito evidentemente deliberado, co ánimo de secundarizar, até a súa eliminación, o noso idioma en usos oficiais e, en paralelo, anular o dereito de administrados e administradas a recibiren atención oral e escrita en galego, e a se dirixiren neste mesmo idioma á súa propia administración. Pretenden tamén perpetrar esta actuación contra Concellos que posúen ordenanza municipal en vigor (por certo, plenamente legal), que regula os procedementos selectivos de persoal desde unha perspectiva ben diferente, máis democrática e galega.

Chama, iso si, poderosamente a atención, a enérxica ameaza dirixida aos Concellos que ousen garantir competencias lingüísticas no seu cadro de persoal, mentres se garda clamoroso silencio ante aqueles outros que vulneran a legalidade (toponímica incluída), no relativo ao (cativo) marco de recoñecemento da oficialidade do galego. Apoio ao galego, prohibido baixo ameaza. Combate ao galego, asumido con agrado e silencio cómplice.
Bon traballo o deste falanxista. “España, unidad de destino en lo universal”. Estaranlle agradecidos. E o peor é que non representa no PP unha anécdota. Ese é o problema. É un máis, na mesma liña dos actuais dirixentes. Igualiño de galeguista que eles, ou que o secretario xeral de Política Lingüística, por certo ben calado neste tema, e que aínda non foi quen de demitir.